Hirugarren Astelehena

GORESPENAK

 Agurra

V/.  Zatozkit lagun, ene Jainko.
R/.  Jauna, zatoz laster ni laguntzera.

V/.  Aintza Aitari eta Semeari eta Espiritu Santuari.
        Hasieran zen bezala orain eta beti
        gizaldi eta gizaldietan. Amen. Alleluia.

 

Goratzarrea

 

1 Ant. Nire bihotzak eta haragiak, Zeugana, Jainko biziagana dihardue poz-jauzika, alleluia.

83 Salmoa

Zure egoitza, gudari-taldeen Jauna,
     bai maitagarria dala!

Agortzen daukat nire arimea,
     irrikaz daukat Jaunaren atarira.
     Nire bihotz eta haragi
     Jainko biziagana poz-jauzika dabilz.

Txoriak ere aurkitzen dau etxea,
     baita elaiak ere kumeak ipintzeko habiea:
     zure altarak, gudari-taldeen Jauna,
     ene Errege ta ene Jainkoa!

Bai dohatsu zure etxean bizi diranak;
     beti Zu goresten diharduenak!
     Bai dohatsu, Zugandik laguntza dauana,
     erromes-txangoak asmatzen dituana!

Ibar Lehorra igarotzean, iturri dabe bihurtzen,
     eta lehenengo euriak onespenez dau jazten.
     Badoaz gero ta kementsuago,
     Jainkoa Sionen noiz ikusiko.

Entzun nire otoitza, Jauna, gudari-taldeen Jainko,
     erne belarria, Jakoben Jainko.
     Begitu eiozu, Jainko, gure Babeskiari,
     begitu zure Gantzutuaren aurpegiari.

Hobe da, jakina!, egun bat zure atarietan,
     eta ez mila bestelakoetan;
     Jainkoaren etxe-atarietan egotea nik nahiago,
     gaiztoen etxean bizi izatea baino.

Eguzki eta babeski jat Jainko Jauna,
     grazia ta ospea emoten ditu Jaunak.
     Jaunak on danik ukatzen ez daki,
     errugabe dabilanari.

Gudari-taldeen Jauna, bai dohatsu,
     Zugan uste on dauan gizakia.

Aintza Aitari eta Semeari,
     eta Espiritu Santuari.
     Lehen lez, orain eta beti,
     eta amaibako egunetan. Amen.

Ant. Nire bihotzak eta haragiak, Zeugana, Jainko biziagana dihardue poz-jauzika, alleluia.

 

2 Ant. Herri asko joango dira Jaunaren mendira, alleluia.

Kantika: Is 2, 2-5

Azken-egunetan, Jaunaren etxearen mendia
     sendo izango da jarria:
     muno guztien ganetik, mendi guztien buru,
     Atzerri-jendeak bertara joko dau.

Herri asko joango dira esanez:
     «Erdu!, igon daigun Jaunaren mendira,
     Jakoben Jainkoaren etxera:

Berak erakutsiko deuskuz bere bideak,
     eta Aren bidezidorretan ibiliko gara;
     Siondik urtengo dau-ta legeak,
     eta Jerusalemdik Jaunaren hitzak».

Berak epaituko dauz atzerriak,
     auzitara ekarriko herriak eta herriak.

Golde bihurtuko dabez ezpatak,
     eta igitai, lantzak.
     Ez dau herrik herriren aurka ezpatarik jasoko,
     ez dira gudurako barriro trebatuko.

Zatoz, Jakoben etxea,
     ibili gaitezan Jaunaren argitan.

Aintza Aitari eta Semeari,
     eta Espiritu Santuari.
     Lehen lez, orain eta beti,
     eta amaibako egunetan. Amen.

Ant. Herri asko joango dira Jaunaren mendira, alleluia.

 

3 Ant.  Esan eizue atzerrietan: «Jauna errege da», alleluia.

95 Salmoa

Kanta Jaunari kantu barri, 
     kanta, lur osoa, Jaunari.
     Kanta Jaunari, bedeinkatu Haren izena,
     iragarri egunez egun, Harengandiko salbamena.

Zabaldu Haren ospea atzerrietan,
     Haren mirariak herri guztietan.
     Handi da-ta Jauna, eta guztiz goresgarri,
     jainko guztien aldean itzalgarri.

Irudi huts dira atzerriko jainko guztiak,
     Jaunak, ordea, zeruak egin ditu.
     Distira ta edertasuna dagoz Haren aurrean,
     indarra ta argia Haren jauretxean.

Herrietako sendiak, emon Jaunari,
     emon Jaunari ospe ta goraldi.
     Emon ospe Jaunari bere izenaren ederrez,
     sartu zaiteze Haren atarietan opariak eroanez.

Gurtu eizue Jauna jantzi gurenean,
     ikara egizu, lurbira guztia, Haren aurrean.
     Esan eizue atzerrietan: «Jauna errege da,
     lurbira kolokatu ez dadin sendo ezarri dau,
     herriak zuzenbidez epaitzen dauz».

Poztu bedi ortzia, alaitu lurra,
     orro egin bei itsasoak bertan bizi diranakaz,
     egin beza txalo landeak bertan dagozan guztiekaz.

Poztu beitez basoko zugatzak
     Jaunaren aurrean, badatorrelako,
     lurra epaitzera datorrelako.
     Zuzenbidez epaituko dau lurbirea,
     eta leialtasunez erriak.

Aintza Aitari eta Semeari,
     eta Espiritu Santuari.
     Lehen lez, orain eta beti,
     eta amaibako egunetan. Amen.

Ant.  Esan eizue atzerrietan: «Jauna errege da», alleluia.

 
Jainkoaren Hitza

Erm 10, 8b-10

        Zeure ondoan dozu hitza: zeure ahoan eta zeure bihotzean. Hitz hori da, guk iragartzen dogun sinismenaren barria. Izan ere, zeure ahoz autortzen badozu, Jesus, Jauna dala, eta zeure bihotzean sinisten badozu, Jaungoikoak hilen artetik biztu ebala, salbatuko zera. Bihotzez sinisteak zuzentasuna dakarsku, eta ahoz autortzeak, salbamena.

R/.  Biztu da Jauna hilobitik. * Alleluia, alleluia. Biztu da.
V/.  Gugatik hagan zintzilik hil zana. Alleluia.
        Aintza Aitari. Biztu da.

 

Bened. ant.  Egizue lan, ez hondatzen dan janariagaitik; betiko bizitzaraino irauten dauanagaitik baino, alleluia.

Lk 1, 68-79

Bedeinkatua Jauna, Israelgo Jainkoa
    agertu eta bere herria askatu dauana;
    salbamen indarra deusku emon,
    bere morroi Dabiden etxean.

Halan eukan-eta berbea emonda bere santuen bidez,
    behinola bere profeta ebazanen bidez;
    salbamena gure arerioen menpetik,
    gorroto deuskuen guztien eskutik.

Horrela egin deutse gure gurasoei erruki,
    bere alkarte santuaz oroiturik;
    egin eutson-eta  gure guraso Abrahami zin-hitza,
    Berak emongo euskula.

Gure etsaien eskutik gu atarata, bildur barik,
    izan gaitezan Haren zerbitzari;
    zintzo eta zuzen Beraren aurrean,
    gure egun guztietan.

Zu, barriz, seina,
    Goi-goikoaren profeta deitua izango zara,
    Jaunaren aurpegi aurretik joango zara-eta,
    Hari bidea prestatzera;
    erakustearren Haren herriari salbamena,
    euren pekatuen parkamena.

Gure Jainkoaren errai errukitsuekaitik,
    agertuko jaku Goiz-eguzkia ganetatik;
    ilunpetan eta herio-gerizpean dagozanei argi egitera,
    gure oinok bake-bidean zuzentzera.

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. Egizue lan, ez hondatzen dan janariagaitik; betiko bizitzaraino irauten dauanagaitik baino, alleluia.

Eskariak

     Goraldu daigun, Aitak goratu eta herri guztien ondare egin dauan Jesus, holan eskatuz:

Salbau gaizuz, Jauna, zure garaipenaren bitartez.

     —Kristo, pekatua eta heriotzea suntsituz, zure garaipenez infernuko ateak apurtu dozuzan Horrek, * egin gaizuz gaur, pekatuaren garaile.

     —Gizaldi guztia, heriotzatik bizira ekarriz, hildako guztiei bizia emon deutsazun Horrek, * gugaz hartu-emonak dabezan guztiei emoiezu betiko bizia.

     —Heriotzea ezereztu eta bizi barria emon deuzkuzun Horrek, * egizu, biziera barri baten ibili gaitezala gaur.

     —Zure hilobiaren zaintzaileak nahasturik, ikasleak poztu zenduzan Horrek, * emon zure zerbitzarioi pozbide osoa.  

(… isil unea, bakotxak bere eskaria egin ahal izan daian).

Gure Aita zeruetan zarana,
santu izan bedi zure izena,
etor bedi zure erreinua,
egin bedi zure nahia
zeruan bezela lurrean ere.
Emoiguzu gaur
egun honetako ogia,
parkatu gure zorrak
geuk ere geure zordunei
parkatzen deutsegun ezkero,
ez eiguzu itzi tentazinoan jausten
baina atara gagizuz gatxetik.

Otoitza

   Zure egiak, Jauna, argitu egiten ditu oker dabiltzanak, bide zuzenera bihurtu daitezan; egizu, izenez kristau diranek egintzetan bete daiela eta agertu, euren kristau-izatea. Zure Seme Jesu Kristo gure Jaunaren bitartez, Zurekin eta Espiritu Santuarekin batean Jainko eta errege bizi da-ta, gizaldi eta gizaldietan.

Amaierea

V/. Bedeinkatu gaizala Jainko ahalguztidunak: Aitak eta Semeak eta Espiritu Santuak.
R/. Amen.

V/. Goazen Jaunaren bakean.
R/. Eskerrak Jainkoari.