GORESPENAK
Agurra
V/. Zatozkit lagun, ene Jainko.
R/. Jauna, zatoz laster ni laguntzera.
V/. Aintza Aitari eta Semeari eta Espiritu
Santuari.
Hasieran zen bezala orain eta beti
gizaldi eta gizaldietan. Amen. Alleluia!
Goratzarrea
Jesus, ondasun-iturri,
ur bizi, gogoen argi,
inungo pozgai guztien
gainetik Zu maitagarri.
Opa zaitut mila bidez,
«noiz zatozkit, Jesus?» galdez,
Noiz poztuko nauzu behingo?
Noiz aseko zure onez?
Ezin esan inork ahoz,
idatziz ere ezin eman,
gertatu zaionak daki
Jesus maitatzea zer dan.
Jauna, geldi zakizkigu,
gogo hau argi bekigu;
Zuk argitasuna ohilduz
lurra pozarazten duzu.
Aingeruen taldeak Zu
zeruan goresten zaitu;
mundu hau alaituz, Aitaz
gu Zuk paketzen gaituzu.
Zakizkigu poz-atsegin,
gure sari zeruetan,
zakizkigu argitasun,
mende guztien mendetan.
Amen.
1 Ant. Jesusek zutunik holantxe egin eban oihu: Egarri dana, betor Neugana eta edan bei.
62 Salmoa
Jainko,
neure Jainko zaitut,
goizetik bilatzen zaitut,
zeure egarriz daukat gogoa,
zeure irrikaz haragia,
lur idor, egarri, ur barik dirudi.
Egona nozu Zuri begira jauretxean,
zure ospea ta indarra ikusi-nahian.
Bizia baino hobea da-ta zure maitasuna,
ezpanok zure goralpena egingo dabe.
Goretsiko zaitut bizi nazan artean,
jasoko ditut eskuok zure izenean.
Gurinez eta maminez lez beteko jat gogoa,
ezpan-ikaraz goretsiko zaitu nire ahoak.
Zutaz oroitzen naz ohe-ganean,
Zeu gogoratzen zaitut gauean.
Zeu bihurtu zara-ta nire laguntzaile,
pozez oihu dagit zure hegoen gerizpean.
Nire gogoa Zuri itsatsia dago,
zure eskoiak eutsita nago.
Aintza Aitari eta Semeari,
eta Espiritu Santuari.
Lehen lez, orain eta beti,
eta amaibako egunetan. Amen.
Ant. Jesusek zutunik holantxe egin eban oihu: Egarri dana, betor Neugana eta edan bei.
2. Ant. Erdu Neugana nekatuok, lanpetuok; eta Neuk arinduko zaituet.
Kantika: Dn 3, 57-88. 56
Jaunak
egindako guztiak, bedeinkatu eizue Jauna:
goretsi eta ospatu gizaldietan.
Jaunaren aingeruak, bedeinkatu eizue Jauna;
zeruak, bedeinkatu eizue Jauna.
Zeru-gaineko ur guztiak, bedeinkatu eizue Jauna;
Jaunaren gudari guztiak, bedeinkatu eizue Jauna.
Eguzki eta ilargi, bedeinkatu eizue Jauna;
zeruko izarrak, bedeinkatu eizue Jauna.
Euri ta ihintz guztiak, bedeinkatu eizue Jauna;
haize guztiak, bedeinkatu eizue Jauna.
Su eta beroak, bedeinkatu eizue Jauna;
hotz eta hotz-min, bedeinkatu eizue Jauna.
Ihintz eta langar, bedeinkatu eizue Jauna;
izotz eta jelak, bedeinkatu eizue Jauna.
Aintziar eta edur, bedeinkatu eizue Jauna;
gauak eta egunak, bedeinkatu eizue Jauna.
Argi eta ilunpeak, bedeinkatu eizue Jauna;
tximist eta hodeiak, bedeinkatu eizue Jauna.
Bedeinkatu bei Jauna lurrak:
goretsi eta ospatu gizaldietan.
Mendi eta muno, bedeinkatu eizue Jauna;
lur ganean ernetzen diran guztiak, bedeinkatu eizue Jauna.
Iturriak, bedeinkatu eizue Jauna;
itsaso eta ibaiak, bedeinkatu eizue Jauna.
Baleak eta uretan dabiltzan guztiak, bedeinkatu eizue Jauna;
zeruko hegazti guztiak, bedeinkatu eizue Jauna.
Piztia eta abere guztiak, bedeinkatu eizue Jauna:
goretsi eta ospatu gizaldietan.
Giza-seme-alabak, bedeinkatu eizue Jauna;
israeldarrak, bedeinkatu eizue Jauna.
Jaunaren abadeak, bedeinkatu eizue Jauna;
Jaunaren morroiak, bedeinkatu eizue Jauna.
Espiritu eta arima zintzoak, bedeinkatu eizue Jauna;
santu eta biotz-apalak, bedeinkatu eizue Jauna.
Ananias, Azarias, Misael, bedeinkatu eizue Jauna:
goretsi eta ospatu gizaldietan.
Bedeinkatu daiguzan Aita eta Semea Espiritu Santuarekin:
goretsi eta ospatu gizaldietan.
Bedeinkatua Zu zeru-sabaian:
aintza eta gorespen Zuri gizaldietan.
Ant. Erdu Neugana nekatuok, lanpetuok; eta Neuk arinduko zaituet.
3. Ant. Seme, ekatzu zure bihotza, eta zure begiek jarraitu beioe neure bideari.
149 Salmoa
Kanta
Jaunari kantu barri,
haren gorespena zintzoen batzarrean entzun bedi.
Poztu bedi Israel bere Egileagan,
alaitu beitez siondarrak euren erregeagan.
Goretsi beie Haren izena dantzarekin,
egin beioe goratzarre zaldabai eta kitararekin.
Maite dau-ta Jaunak bere herria,
umilak ditu garaipenez jantziak.
Goraldi horretaz zintzoak alaitu beitez,
euren etzun-lekuetan oihu egin beie pozez.
Bego Jainkoaren goralpena hareen eztarrietan,
egon beitez aho biko ezpatak hareen eskuetan;
atzerriengandik mendekua hartu daien,
herriak zigortu daiezan;
hareen erregeak lotu daiezan katez,
hareen handikiak, burdin-uztaiez.
Idatzirik dagoan epaia jazo bedi:
gorapide hau dagokie Haren zintzo guztiei.
Aintza Aitari eta Semeari,
eta Espiritu Santuari.
Lehen lez, orain eta beti,
eta amaibako egunetan. Amen.
Ant. Seme, ekatzu zure bihotza, eta zure begiek jarraitu beioe neure bideari.
Jr 31, 33
Hauxe izango da, egun hareen ondoren Israelgo etxearekin egingo
dodan ituna —dino Jaunak—: Nire Legea euren barruan ezarriko deutset, eta euren
bihotzean idatziko; eta Neu izango naz hareen Jainkoa, eta hareek neure herria.
R/. Hartu eizue neure buztarria, * eta ikasi neugandik.
Hartu.
V/. Bihotz-bera naz eta apala. Eta ikasi.
Aintza Aitari. Hartu.
Bened. ant. Agertu jaku Jainkoa, bere errai errukitsuakaitik, eta askatu dau bere herria, alleluia.
Lk 1, 68-79
Bedeinkatua
Jauna, Israelgo Jainkoa
agertu eta bere herria askatu dauana;
salbamen indarra deusku emon,
bere morroi Dabiden etxean.
Halan
eukan-eta berbea emonda bere santuen bidez,
behinola bere profeta ebazanen bidez;
salbamena gure arerioen menpetik,
gorroto deuskuen guztien eskutik.
Horrela
egin deutse gure gurasoei erruki,
bere alkarte santuaz oroiturik;
egin eutson-eta gure guraso Abrahami zin-hitza,
Berak emongo euskula.
Gure
etsaien eskutik gu atarata, bildur barik,
izan gaitezan Haren zerbitzari;
zintzo eta zuzen Beraren aurrean,
gure egun guztietan.
Zu,
barriz, seina,
Goi-goikoaren profeta deitua izango zara,
Jaunaren aurpegi aurretik joango zara-eta,
Hari bidea prestatzera;
erakustearren Haren herriari salbamena,
euren pekatuen parkamena.
Gure
Jainkoaren errai errukitsuekaitik,
agertuko jaku Goiz-eguzkia ganetatik;
ilunpetan eta herio-gerizpean dagozanei argi egitera,
gure oinok bake-bidean zuzentzera.
Aintza Aitari eta Semeari,
eta Espiritu Santuari.
Lehen lez, orain eta beti,
eta amaibako egunetan. Amen.
Ant. Agertu jaku Jainkoa, bere errai errukitsuakaitik, eta askatu dau bere herria, alleluia.
Eskariak
Bihotz-bera eta apala dan Jesusi eskatu deiogun, esanez:
Errege bihotz-bera, erruki.
—Jainkoaren betea Zeugan daukazun Jesus, * egin gaizuz, zure jainkozko izatearen erdikide.
—Jesus, Zeugan dagoz-eta jakituriaren eta jakintzaren aberastasun guztiak, * agertu eiguzu, Eleizaren bitartez, era askotako Jainkoaren jakituria.
—Aitari atsegin zaizkozan Jesus, * egin gaizuz zure hitzaren entzule zintzo.
—Bete-betean daukazunetik, guztioi emon deuskuzun Jesus Jauna, * isuri eiguzuz oparo Aitaren grazia eta egia.
—Jesus, santutasunaren eta biziaren iturri, * egin gaizuz santu eta errubako maitasunean.
(… isil unea, bakotxak bere eskaria egin ahal izan daian).
Gure Aita zeruetan zarana,
santu izan bedi zure izena,
etor bedi zure erreinua,
egin bedi zure nahia
zeruan bezela lurrean ere.
Emoiguzu gaur
egun honetako ogia,
parkatu gure zorrak
geuk ere geure zordunei
parkatzen deutsegun ezkero,
ez eiguzu itzi tentazinoan jausten
baina atara gagizuz gatxetik.
Otoitza
Jainko ahalguztiduna, zure Seme maitearen Bihotza goresten dogula, zure maitasunaren dohai miragarriak ospatzen ditugu; iguzu, jainko-iturri horretatik hartu daigula, gainezka darion grazia. Zure Seme Jesu Kristo gure Jaunaren bitartez, zurekin eta Espiritu Santuarekin batean Jainko eta errege bizi da-eta gizaldi eta gizaldietan.
Amaierea
V/. Bedeinkatu gaizala
Jainko ahalguztidunak: Aitak eta Semeak eta Espiritu Santuak.
R/. Amen.
V/.
Goazen Jaunaren bakean.
R/. Eskerrak Jainkoari.