Hirugarren Martitzena

GORESPENAK

 Agurra

V/.  Zatozkit lagun, ene Jainko.
R/.  Jauna, zatoz laster ni laguntzera.

V/.  Aintza Aitari eta Semeari eta Espiritu Santuari.
        Hasieran zen bezala orain eta beti
        gizaldi eta gizaldietan. Amen. Alleluia.

 

Goratzarrea

 

1 Ant. Zuk bizten gaituzu barriro, Jauna, eta herria zeugan poztutzen da, alleluia.

84 Salmoa

Zure lurrarekin, Jauna, onbera agertu zara,
     on bihurtu dozu Jakoben zoria.
     Parkatu deutsazu zure herriari gaiztakeria,
     estaldu deutsazuz hoben guztiak.
     Emon deutsazu galga zure sumin handiari.
     atzera eragin deutsazu zure hasarre-minari.

Birbiztu gaizuz, Jainko gure salbatzailea,
     itzi eizu gugana daukazun hasarrea.
     Gurekin betiko hasarratu zara, ala?
     Zabalduko dozu hasarre hori gizaldi guztietara?

Ez gaituzu barriro biztuko, ala?
     Ez da zure herria Zugan poztuko?
     Jauna, zure onginahia erakutsi eiguzu,
     zure salbamena emoiguzu.

Entzungo dot Jainko Jaunak dinoan hitza:
     «Bakezkoa da Jainkoaren hitza,
     bere herri eta bere zintzoentzat,
     bihotzez Harengana bihurtuentzat».

Hurrean jake Haren bildur diranei salbamena:
     gure lurrean Haren aintza bizi izango da.
     Onginahiak eta leialtasunak alkarren bidera urtengo dabe,
     zuzentasuna ta bakea laztanka bizi izango dira.

Lurretik erneko da leialtasuna,
     zerutik begira egongo zuzentasuna.
     Jainkoak on dana emongo dau,
     gure lurrak bere uzta ekarriko dau.

Zuzentasuna ibiliko da Haren aurrean,
     eta salbamena Haren urratsen bidean.

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. Zuk bizten gaituzu barriro, Jauna, eta herria zeugan poztutzen da, alleluia.

 

2 Ant. Itxaron dogu Jaunagan; Harek argia eta bakea emongo deuskuz, alleluia.

Kantika: Is 26, 1-4. 7-9. 12

Bai sendo gure uria!
     Harresi eta harresi-aurreko babes jarri deutsoz.
     Zabaldu eizuez ateak,
     sartu dadin herri zintzo eta leiala.
     Sendo dauka bihotza eta zaintzen dau bakea,
     Zeugan dau-ta itxaropidea.

Itxaron beti Jaunagan,
     Jauna da-ta Harkatx menderen mendeetan.

Zintzoaren bidea zuzena da,
     Zeuk zelaitzen dozu zintzoaren bidezidorra.
     Zure epaien bidean, Jauna, zain gaituzu,
     zure izenaren eta oroipenaren egarri gara.

Nire bihotza zure egarri da gauean,
     nire gogoa zure bila dabil goizean,
     zeure epaiek argitzen dabe-ta lurra,
     eta zuzentasuna ikasten, lur osoan bizi diranek.

Jauna, Zeuk emongo deuskuzu bakea,
     gure egite guztiak Zeuk eginak dira-ta.

 Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. Itxaron dogu Jaunagan; Harek argia eta bakea emongo deuskuz, alleluia.

 

3 Ant.  Lurrak bere uzta emon dau: poztu bediz kantari atzerriak, alleluia.

66 Salmoa

Erruki bekigu, Jainkoa, bedeinkatu gaizala,
     agertu deigula aurpegi alaia;
     ezagutu daien lurrean zure bidea,
     herri guztietan Zugandiko salbamena.

Ene Jainko, ospatu zaiezala herriek,
     ospatu zaiezala herri guztiek.

Poztu beitez kantari atzerriak,
     zuzenbidez daroazu-ta izadia;
zintzo dozuz-eta gidatzen herriak,
     eta zaintzen lurrean atzerriak.

Ene Jainko, ospatu zaiezala herriek,
     ospatu zaiezala herri guztiek.

Lurrak bere uzta emon dau,
     Jainkoak, gure Jainkoak, bedeinkatzen gaitu.
     Jainkoak bedeinkatu gaizala,
     lur bazter guztiek bildur deutsoela.

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant.  Lurrak bere uzta emon dau: poztu bediz kantari atzerriak, alleluia.

 

Jainkoaren Hitza

ApEg 13, 30-33

     Jaungoikoak biztu egin eban Jesus hilen artetik; eta Galileatik Jerusalemera Haregaz igon ebenei egun askotan agertu jaken. Horreek dira orain Haren testigu herriaren aurrean. Guk, barriz, hauxe adierazoten deutsuegu: gure gurasoei egindako agintzaria Jaungoikoak geuri, seme-alaboi, bete deuskula; biztu egin dau-ta Jesus. Halan dago idatzita bigarren salmoan: «Neure seme zara zu; Neuk zaitut gaur Zu sortu».

R/.  Biztu da Jauna hilobitik. * Alleluia, alleluia. Biztu da.
V/.  Gugatik hagan zintzilik hil zana. Alleluia.
        Aintza Aitari. Biztu da.

Bened. ant.  Benetan dinotsuet: Ez eutsuen Moisesek emon zeruko ogia; neure Aitak emoten deutsue zeruko egiazko ogia, alleluia.

Lk 1, 68-79

Bedeinkatua Jauna, Israelgo Jainkoa
    agertu eta bere herria askatu dauana;
    salbamen indarra deusku emon,
    bere morroi Dabiden etxean.

Halan eukan-eta berbea emonda bere santuen bidez,
    behinola bere profeta ebazanen bidez;
    salbamena gure arerioen menpetik,
    gorroto deuskuen guztien eskutik.

Horrela egin deutse gure gurasoei erruki,
    bere alkarte santuaz oroiturik;
    egin eutson-eta  gure guraso Abrahami zin-hitza,
    Berak emongo euskula.

Gure etsaien eskutik gu atarata, bildur barik,
    izan gaitezan Haren zerbitzari;
    zintzo eta zuzen Beraren aurrean,
    gure egun guztietan.

Zu, barriz, seina,
    Goi-goikoaren profeta deitua izango zara,
    Jaunaren aurpegi aurretik joango zara-eta,
    Hari bidea prestatzera;
    erakustearren Haren herriari salbamena,
    euren pekatuen parkamena.

Gure Jainkoaren errai errukitsuekaitik,
    agertuko jaku Goiz-eguzkia ganetatik;
    ilunpetan eta herio-gerizpean dagozanei argi egitera,
    gure oinok bake-bidean zuzentzera.

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. Benetan dinotsuet: Ez eutsuen Moisesek emon zeruko ogia; neure Aitak emoten deutsue zeruko egiazko ogia, alleluia.

Eskariak

     Poztu gaitezan Kristogan, hildako gorputza bere indarrez berbiztu ebalako, eta eskatu deiogun:

Emoiguzuz, Jauna, zure biztuerearen frutuak.

     —Kristo Salbatzaile, zure bizteaz emakumeak eta Apostoluak poztu zenduzan eta mundu guztia barritu: * egin gaizuz Jainko biziaren lekuko.

     —Biziera barrira eroango gaituan biztuerea agindu deuskuzu guztioi: * egin gaizuz zure barri onaren zabaltzaile.

     —Apostoluei askotan agertu zintxakezan, eta Espiritu Santua emon zeuntsen: * barritu eizu gugan Espiritu bizi-emoilea.

     —Gizaldien azkeneraino zeure ikasleakaz izango zinala agindu zenduan: * egon zaitez gaur gugaz, eta lagundu eiguzu beti.

(… isil unea, bakotxak bere eskaria egin ahal izan daian).

Gure Aita zeruetan zarana,
santu izan bedi zure izena,
etor bedi zure erreinua,
egin bedi zure nahia
zeruan bezela lurrean ere.
Emoiguzu gaur
egun honetako ogia,
parkatu gure zorrak
geuk ere geure zordunei
parkatzen deutsegun ezkero,
ez eiguzu itzi tentazinoan jausten
baina atara gagizuz gatxetik.

 
Otoitza

   Urez eta Espiritu Santuaz barriro sortu diranei zure erreinuko ateak edegiten deutsezuz, Jauna; gehitu eizu hareen barruan Zuk emondako grazia, pekatu guztietatik garbiturik, zure agintzari guztiak jadetsi daiezan. Zure Seme Jesu Kristo gure Jaunaren bitartez, Zurekin eta Espiritu Santuarekin batean Jainko eta errege bizi da-ta, gizaldi eta gizaldietan.

Amaierea

V/. Bedeinkatu gaizala Jainko ahalguztidunak: Aitak eta Semeak eta Espiritu Santuak.
R/. Amen.

V/. Goazen Jaunaren bakean.
R/. Eskerrak Jainkoari.